A NEVA! A NEVA!

Che bela sorpresa, apena dasdà,

avrir tutt al finestri e vedar ch’è anva!

Chi bei strasulen ch’is dondlan in dl’aria ..

e in lé cal mument as dassed la memoria

ad quend da ragass, da la scuala al caffè

a favn al sbaladi matina e mezdé.

. . .e al madr a sigar «Vin dentar, tan ved

ch’at sia moi angà e ad culor già dal fred?

Dai Sauro, dai Mauro, gnì dentar a magnar

e pò agh’ari enc i compit da far».

Nuentar la fora an sintivan mia gninta

ma ensi as curivan adria con più grinta

daventi la ciasa, daventi al barbiar

bagna fin al coll, ma sensa pinsiar.

E a chi gh’in fargava d’aver mal la pensa,

la toss, la diarrea o enc l’influensa?

Un bel putaciott agh’iara da far:

chi gh’iva in dLa testa d’andar a studiar?

Par daras un pò d’energia e ad calor

andava in caffè e a rubava un liquor

a favan una bela granita a la menta

par vler festeggiar tut cla nev acsé senta.

Pinsand a chi szuag ch’in turnaran più,

ai più bei bei mument ad la gioventù,

a torn a guardar daventi al purton

e a vedar la nev, am vian al magon.

Mauro (Imer) Tinti

Tratto da: Turnand a San Szvan

Anno 1986