Al magnadi ad langorii in dla mlunara ad Roldo Aleotti ates al simiteri.
Ad chè sti gioran nuentar baghett an vdivan l’ora che Roldo Aleotti al tacas a sunar al langorii, parchè acsè a la sira andavan in dla so baràca fata ad cana, con la lempada a carburo par far un po’ ad lus insima al tavlòn, col benchi ad piopa coi pè piantaa par tera, a magnar na mesa langoria pr’on in cumpagnia, puciandag dentar soquent grusten ad pen cumun che a s’iran pasaa a cumprar da Oreste e la Fermina, la madar ad Luigi al furnar .
Al bel ad la magnada in cumpagnia, al gniva dopa quend a favan do o tre squadri, Quarentul; Baracon; Crist e a tacavan a szugar a cuaciona o caplada, cioè ognun ad nuentar al sarcava ad metar la gusa ad la so mèsa langoria incastrada insima a la testa ad chiatar amig ad la squadra aversaria. A vinsiva quei che a la fin a n’iva incaplaa di più. As curivan adree fin dal simiteri e chè ogni tent un qualchidun c’al gh’iva fifa als farmava e subit al gniva incaplaa.
Al szog l’era ancora più bel quend un qualc amig al purtava na surela o na cusèna parchè con la scusa c’an s’avdiva n’orba gosa e lor li gh’iva paura, l’ira na bela ucasion par cuminciar a brasar na qualc bagheta……
Che bei temp, as gudivan con poc e al nostar famii is fidavan a mandaras in gir ad sira enca se l’illuminasion ad Quarentul l’ira fata con tre lampadini, una al Crist, una al Baracon e una a l’incros ad Nicolini; alora nuentar baghett andavn in gir in biciclèn ognun con la so dinamo, fanal e fanalèn, in più a gh’ivan i pisafog c’as iutava.
Av ricurdav i pisafog quent ag n’ira in gir par al nostri campagni e quenti reni a cantava adlonga ai fos che tutt nuentar a gh’ivan agl’energii par “saltari a la longa”?
