Da Modena Luigi Zanfi

Commenti (0) Primo Piano

Senza titolo-1

Compermàs, scusè al distureb, a vliva dir . . . a l’ètra not am sòun imbatù a pasèr d’in Piàza Granda: l’era vòda; a gh’eren sol me e la Bunésma, che anzi, av dirò, a n’ho aprufitè per diregh: — Chi siete? Io non lo so . . .! —; a zuraré ch’la m’ha rispost: — Fréghten! —; cus’a vliv, dal gran stèr in piaza l’ha imparè il modo di esprimersi scorrevole, efficace, convincente di questo ambiente.

Comunque, Mo­dena ed not l’è bèla … e se po’ av fermè e scultèr e a pinsèr, e v’è davìs ed vàder di fantèsma fer la scundròla eddré dal culouni di pordegh. Già, perchè po’ Piaza Granda l’è, e l’è sèimper stèda, al cor, al garòl, l’anma, l’umbréghel della Modena di tutti i tempi; chè a truvàm reliquie e simboli ed la storia ed Modena: al Dom, la Ghirlandèina, la Bunésma, la Preda ringadora, la Butéga di sold al post ed la Giustézia, ecc. ecc.

Da questa piazza hanno preso le mosse le grandi imprese come le grandi mi­serie di cui è costellata la storia della nostra Città .. . ecco, me le rammentava donna Bonissima, vale a dire la piò gran braghéra di tutti i tempi; mo ragaz, mo la nostra dunlàta l’è in piazza, da l’ultem d’avril dal 1268; chele là n’ha vèst e sinti ed tot i culor pez d’un tivucolor mo la gh’ha ’na memoria ed fèr, figurèv ch’la s’arcorda infin la bataglia ed la Fuselta quand i Bugnés i ciapén al re. La dis che i Bugnés i éren carógna e dragòun, mo anch i Mudnés i éren di piò fat taca-lit!

E difati a fò propria chè. in ’sta piaza che, al martellar della maggior campana i Geminiani i sàltén za dal let e i curén chè, indove i truvén al Potta che, a cavallo, armato, con la braghetta rossa e le pianelle, avea spiegato lo stendardo maggior con le trivelle; mo egh giv Giolia?

Ecco che però la Bunésma la s’arcorda quand dal 1468 la gnè trasferida dal pridòun di centro piazza a la cantunèda dal Castlèr: — Cusa vliv mai, quand a se dveinta vèc, a s’è in di pée a tot… e dir che me, alora, a i aviva apèina cumpì i dusèint’an . . . mo i tachén a dir che in piaza a gh’era gnu dal muvimèint… a fèria curta me a i era in di pée . . . mo nova! —

Che memoria ’sta vècia! Figurev ch’la s’arcorda quand, dal 1796 chè in piàza i piantén ’na piòpa elta sèimper, con inzèma un bertoch francés e i la badzèn « L’al­bero della libertà »; i mudnés i given: — I han mes so la cucagna; mo che forza ’sti francés! — Bravo gabian . . . eter che cucagna! —

E po’ la m’ha cuntè la storia ed Muzarèli da San Vìi detto al « Cmèin », un di­sertore dell’Armata Napoleonica che, da cla via, al s’era més a fèr al brigant; quand finalmèint i suldè dal Dòca i al ciapén, igh fén la festa chè, in Piaza. A i eren là ai 28 de znèr dal dàdes, igh taién la testa con ’na machina nova inventèda dai fran­cés; la maràia l’andé in piaza or e or prèma per litighères i post miòr, qui che adèsa ci dicono « posti di ring ». Un fràd boia e po’ . . . grande delusione e proteste per­chè al spetacol l’era durè trop poch. Vacca che tamplèda! . . . Però, per al Cmèin l’era durè abàsta!

E po’ l’am cuntèva ed quand i debitor i gniven strabizèe a cui nud inzéma a la preda ringadora… e po’ la politica … e po’ e gl’eleziòun e i descors dal balcòun ed la Cumuna, Gessomaria quant descors e quanti bandér che, di tant in tant el cambièven culòr e quanti aquil: l’aquila Estense, l’aquila napoleonica, e po’ l’aquila estense ’n’etra volta e po’ l’aquila… un mumèint, fermi tutti, perchè me an voi menga fer la fin dal pover Cmèin . . . meno mel che adèsa al post ed l’aquila a gh’avàm du falcàt!!

Luigi Zanfi

Tratto da “Al Rezdor 1981”

Lascia un commento

Il tuo indirizzo email non sarà pubblicato. I campi obbligatori sono contrassegnati *