Al teàtar di burateen

Pasand davanti al nóov cinema Astoria, ad còo a la via Fenice, tées ai fior, suspirand am ‘s rinfresca la memoria e am ‘s ‘insmarglènta un cunsineen ad còr.

Cinema Italia: a chi a n ‘agh veen in ment, quand a s’eran puteen da scalfaròtt, vistii d’un slivurnèen, ma acsì cuntent, con i purillo e coi bragheen tutt rótt?

E la festa più granda l’era quand a rivava l’alegra cumpagnìa di burateen, pr’i pìcui e pr’i grand: a s’aspetava un mees con frenesia.

Ruglett d’banda a l’ingress ancora sraa,

e par ciapar al scràni far la corsa,

sarcand Preti (in du s’éral mai lugaa?)

e al sgnori tgnénd been strìca al brass la borsa.

Al teatreen al steva lì, saraa, po’ i tindagg i s’avrivan par magia e dal vlù ross, un poc smintii e risaa, as mustrava l’intera cumpagnia.

La Pulonia, con la canèla in man,

la ciucava Sgurghigul e Sandron;

al guardii, ‘na razdora e anch ‘un sultaan

is piciavan con tégi e con baston.

Ma la più bela l’era la regina

di burateen, la mistra dal languoor:

la pariva ‘na pupla a la matìna,

e agh lusiva la bóca a forma ad coor.

Al lugioon l’era un poc dascamisaa,

coi barciucc miss a cupirói da gianda,

e as féva al tifo cume scalmanaa,

mustrand i pugnn a quel ch’a gh ‘era ad banda.

Quant ricord! I suldeen cuntaa a un a un pr’i bigliett, par al bif e al nusulini. Adesa a n ‘as pool vedar più nisuun a vendar saladini e brustulini.

E spudaciaar in coo a quéi davanti tutt i gusói, chinandas par sgnasaar, pistand i pè su i àsi trabalanti, e tgnir d’occ i murós, e po’ gnicaar.

Cinema Italia: storii d’atar temp, cuntadi ad una ad una dentr’al cor par ‘na vita, e pasadi in un mument, ch’i profuman da mandurli e d’amor.

I’en dal piculi storii da paes, i’en dal piculi storii persi in d’i ann: “Av salutt, o me caar mirandulees, av salutt, e ad arvedars a statr’ann!”.

(congedo del burattinaio)

Brunetta Panzani