Jusfen e la Marta i è du cuntaden ad Quarantul ch’i vrevan andàr a far spesa in zitàa cioè a la Mirandla e, quand i è pront par partir, la Marta l’as arcmanda con Jusfen:

“dascurem in dialett mirandules Jusfen, ch’a na sfema mia tgnosàr ch’a sem ad Quarentul !”

I giran par la piazza e i vedàn na gran vedrina con un cartell ” Giacche 15 euro, Pantaloni 10 euro, Camice 5 euro”.

Jusfen,ch’al gh’ha da vestiràs, vdend che tutt l’è a bon marcà l’entra subit con la Marta e al dis in dialett mirandules:

” a vrevv cumpràr du giachètt, tri par ad braghi e zinch camisi!”

Al comess al li guarda pensieròs e pò l’esclama….

“Vu si ad Quarantul!”

La Marta guarda Jusfen e pò rivolta al comess:

“ma….cum al fatt a savèr ch’a sem ad Quarentul?!”

“Parchè questa l’è na lavanderia minga na butega d’abbigliament!”