Quand ho fat al prim libar sui Mirandules, più d’un al m’ha dit “mo tat’se dasmingà ad mettrag Mario!” “mo Mario al s’ufindrà, ca ta na gl’ha mingamiss?”

A Mirandla tutt i’ial ciama Mario, chissà parchè ?..cume dir.. “me a son in cunfidensa”

Ann’è minga c’am sia dasmingà, l’è che al n’um simbrava minga al so post…

Oh, lu l’è dvintà un ca conta dabòn, a Mirandla, a Modna, a Roma, a Brusèl o Sanfransisco….

Al g’ha goga e magoga, l’è vera, ma ad vadrà che al sl’è guadagnada la pagnoca, con la testa, con al man, con al gambi e coi pè (tic tic tic tic) cal g’ha ancora la lengua fora adess, e anch con la machina, parchè di chilometri al na sgugnà un bel góss.

Me al poss dir parchè i me prim chilometri a’iiem fat insém, su e zo par l’Europa, cume un che al vaga a Modna e al torna indrè in giurnada.

Amarcord un gioran con la Biemvu che a sem partì a la matina a se ori, a sem rivà a Viena a mezdì, em lavurà fin a se ori sot sira, a sem partì e a sem rivà a Mirandla a mezanot.

Oh, e angh’era minga tutt autostrada cume adess.

Quand a sem gnù fora a Regiolo, a guidava me, la pulisia l’ha s’ha farmà.

Andava ancora cume sa fuss in autostrada, sgasand ai 150, 160 minim.

“Seenta, favorisca documenti. Ma cossa crede di essere a Niu Iork? (parché propria Niu Iork an l’ho mai capida, chi va tutt ai 50 masim)”

Alora a g’ho cuntà che la giurnada l’era stada pesa e che an’vdiva l’ora ad pugiarum in dal me lèt e pò a g’ho dit l’itinerari.

Al ma guardà cume sa fuss un matt e, forse pinsand ca psiss far anch un qual brutt att, al ma dit “ Vada, vada pure, solo che con il rumore del motore sveglia la gente del paese.”

A gh’insarev da cuntar dagli aventuri con Mario che an bastarev nè al suo, nè al mio di libar, a gh’avrev n’encicolpedia.

Oh, signor sindaco, e al bust in bronz davanti al municipi, quand’è cal femm? O al dutor el trop poc alineà?

Tratto da “Mirandolesi razza ariana” di Gianni Bellini – anno 2006