Personagg a la Mirandla – Al Gavon

Commenti disabilitati su Personagg a la Mirandla – Al Gavon Personaggi

nona ai me car mirandules 1

Tratto da “Nona i me car mirandules…” di Vilmo Cappi e Giuseppe Morselli – edizioni Al Barnardon – anno 1978

In mezz a tanti maciétti ch’a gh’è sta a la Mirandula na volta, a v’in vói ricurdar dò che pr’un motiv o par n’antar i meritan ad passar a la “Storia”, una d’ soquant ann fà, cl’altra quasi di dì d’incò. Al prim l’è un certo Ceretti ch’i dgivan al Gavòn, ch’al vivi in dal secul passa e ai prim ad quest’ché ma ch’il nominan incora parchè l’era un numar cum’ è pochi. Al tgniva, cum’a custumava na volta, il difesi in Pretura d’la gent ch’an gh’iva minga l’avocàt; l’iva impara qualco­sa, al s’era impratichì ad dò o tre quistion e al Pretòr al gh parmittiva d’assistar e ad tòr la part cioè la difesa ad chi an saviva minga dir i sò fatt e ad chi l’era in buletta; al più dil volti al dgiva d’la roba da fògh ma a la gent al gh piasiva parchè al dascuriva dificil e anch parchè al s’fava pagar in natura (un pilòn d’ven par es., un sachett ad farina,’na zésta d’ pòm campanen, ecc.) e tutt par dritt o par travers i truvavan prim o dop la manèra ad cuntintaral.

L’era ùn di più scars pagadòr ch’a s’agh fuss e ch’agh sia mai sta. Na volta ch’al gh’iva da dar di sold da d’i ann a la veccia Burtlàia (Bertolaia, una dil famìi più antighi d’la Mirandula), a lè ch’l’ a gh ‘i dmandava, al truvò la manèra d’an darghi minga e a zonta ad faragh far na figura da ciold. Sta vcìna, ch’l’a gh’aviva na butèga ad frutta e verdura ad fianch al Palazz dal Municìpi, na volta ch’l’era un Sabat da matìna, stufa e arcistufa da dmandarghi e d’averghi rimanda duzent volti, l’al ciapè pr’al giachett in mezz a la gent e la turnè a dmandaragh i sò sold: “E allora, avocàt — parchè a’l Gavòn i gh’a dgivan avocàt — allora, par stì sold?”. E al Gavòn, in mezz a la gent, con la faccia più bella da sta mond cum’ è ùn ch’a fess par tre o quattar volti un piasèr: “Me li darete, buona donna!” e via par la sò strada dritt cum’ è al Dùca. Al Gavòn l’era un personagg’ vera e propri, da qualunque cò t’al tuliss, in dal fisich, piculott, un poch curv’ad spalli, con la testa insacca­da in dal coll, con na vòs bassa e cavernosa da baritono un po’ ragaient, vastii con na gabana larga e scura, veccia ma sempr’in ordan e po’ anch in dal mod ad vivar.

Al gh’aviva na muièr ch’l’a fava l’impussibil par faragh tòr a man un lavor ch’a cuntass, ma lù gninta; agh piasiva da più ad far l’oratòr, ad far di dascòrs; acsé, i favan dil litt da curtell. In una da stil litt, l’andè a finir che al Gavòn al ciapè un colp con na furzinna da magnar in d ‘la faccia e par schivar al pézz al tgnì corrar in zima a i copp d’la cà e staragh un bell poch. Dop minga dimondi temp da sti fatt purtropp a gnì a murir sò muièr; al Gavòn al tgniva anch, a pagament, di dascòrs “funebri”, cioè quand a muriva un, e i stavan par suppliral, lù, al zimitèri, davanti a la busa e in mezz a la gent dal funeral, al gh fava l’elogio: il qualità dal mort, cus’l’iva fatt in vita, ecc.; e tutt a battr’il man e a pianzar. Ora, quand a muri sò muièr, al Gavòn, ch’as gh’ a vdiva ancora in faccia al segn d’la sfurzinada, al taccò l’elogio, davanti a la cassa, a busa averta, con stil paròli chè: “Mai un litiggio, mai una parrola…” (quand al s’dava d’l’importanza l’arduppiava il lettri dil paròli) e via dritt con la stessa musica, con la gent ch’as lugava ùn da drè da cl’atar pr’an faras vedar a carpar dal ridar e pr’an faras cumpatir, al zimitèri e davanti a la morta in d’la cassa.

I commenti sono chiusi.