QUEND A MASAVAN AL PORC!

L’apuntament l’iara par la matina

tra al chemp, al teatren e la cantina:

circa a sia ori e con un fred da chen

indl’ara i dascargavan al ninen;

agh’ira a vedral quasi mes paes

cum’è un spetacul aspetà da mes.

Al scuriatava trist cal bastiulen

col mus lustrâ e pulì cme un figuren

ma quend pò il bracavn in du o tri

coi vers l’iva capì cl’iara finì,

l’iva finì ad gustar dla bona zotta

in cal casell ad lung a la via ad Sotta.

Na scurtlada in dla gola con violensa

e al sanguv c’al curiva lunga la pensa

al rivava a spurcar infin al giass,

mentr al pcar al la piava col curtlass

e dop averl avert e impicà

indla cantina l’armagniva srâ.

E la matina dopa che alegria

vedral taiar e senza butar via

gnenc n’ongia, gnenc la lengua o un quale budell.

Infin la coa la cuntava quell:

chi vint salam e chi quatar parsutt

is davan da magnar par n’ann a tutt

e angh’iara gninta c’al fuss bon e sen

cme na sulsisa con al rusmaren

o l’ont cl’ira un spetacul col gnoc fritt.

Sol a pinsarg, am vian l’apetit.

Mauro Tinti

Tratto da: Turnand a San Szvan – Poesie dialettali in dialetto di Disvetro di Cavezzo (Mo)

Anno 1986