Adess as diz la prof. e caso mai a sagh’da dal te.

Na volta l’era la signora Rosta e l’era cume na parola d’ordine, angh’era ad bisogn ad zuntar gnint atar.

E al titul la sal meritava tutt…alta, raffinata, signorile, eleganza classica, a scola grembiule nero…minga tant minigonne o l’umbrigul a l’aria cume al prof dal dì d’incò.

Pronunciar, oltre al cugnom, anch al nom, Giuseppina, iss’tintava in poch…un po’ tropa cunfidensa.

Sol al prof. Festanti as’tintava, ch’iiera amigh da ragasói.

In tuta la provincia i saviva chi l’era…muier ad Tusatt, con mila biolchi ad tera, cla stava in dla vila di Tusatt a Mdola, quasi un castell,  vicepreside (al preside chi l’ha mai vist!), latèn e grech incorporà, viso sereno, ridar poch, brillante in dal stess temp, qualche sorriso apena apena, ma suficient pr’aver l’impresion cass’erain sintonia…

Dopa, as capiss, agh’era di sogètt cume mè che igh’dava poca sudisfasion, ma cuma sa da dir, oia da cuparm adess pr’annaver minga capì prima?

Suicidium post tergum?

Tranquii avocatt, a mal son invintà.

Na volta l’è gnuda in class – da vicepreside – e la m’ha dit… prendere, quello che hai fatto non è contemplato nelle biricchinate in elenco…”.Iva po sol brusà i cavì ad la Tisiana Righi in dl’ora ad scienze, ma poch…si e no na cioca.

Buon viaggio signora Rosta

Tratto da “Mirandolesi razza ariana” di Gianni Bellini – anno 2006