La Cisìrra l’era armàsa da par lé

a studiar al fen là in ‘na cavdàgna,

i sòv i’eran par spesi zò al Caròbbi.

La gh’iva cald e la guardava l’ombra

dal vidi impiccàdi attacch a i’ólum

quand a passé da d’iì Pirèn Stuffài

che a Murtzòl i ciamàvan al gallett.

Al zuvnott al s’farmé a guardar al bianc

ch’a sa vdiva tra’l suttàni e i calzett.

L’era tant ch’al gh’ feva l’acqua adré

ch’al pinsé ch’era gnu l’ora ad pruvàr,

e al s’gh’avsiné con l’aria dal gattòn

tuccàndgh’i sentiment e anch quell’àtar.

La Cisìrra, ch’la gh’ n’iva anch un po’ vòia,

la vlìva salvar almanch la dignità

e la fé pressapoch cumè al gallìnni

chi sbàttan i’ali finzénd ad dir ad no.

E acsì sott’a l’ombra ad cal piantàdi

as poi dir che la terra la tarmò.

Libero Gavioli

Tratto da “Della Vecchia Mirandola e di poche altre cose” scritto da Libero Gavioli – 1989