Verament lù al sarev Simuèl iunior, parchè al ver Simuèl al sarev so padar

Lionello: brav om oh, ma un poc originalot.

Na matina in piasa Gasparòn, cal sa tutt e al tgnos tutt, al m’ha dmandá:

“mo chi el quel là?” “Simuèl” a g’ho dit.

Ma al gh’iva ragion lù, parchè Bruno l’era sotto mentite spoglie: completo Zegna ad vigogna grisa, camisa celesta, cravata scosseze e pulover rosso fiamma.

Ehi, vedar Bruno vestì acsè, l’è cume vedar da Mirandla in dla stesa giurnada agli alpi e i’iapenèn in na volta sola: a capitarà do volti in n’ann.

Simuel al s’è fat al so calendari; a gh’è al gregoriano, l’arab, al barnardòn e a gh’è quel ad Simuèl:

360 gioran lavorativ, Nadal, Pasqua (ma sol meza giurnada can’esagerema), al 25 d’avril, la festa ad Franciacorta (che par solidarietà lù bisogna cal lavora pr’organisarla) e n’entra giurnada a scelta par na malatia o un qualch bisogn ecezional, an’sa mai.

E la giurnada lavorativa la sa svolg acsè: a se ori as partis, a preparar camion e atrès (che i’ioperai in perda dal temp quand i riva), vint ori ad lavori forzati, con n’interval ad mez’ora par magnar, bevar, far i cont e al boli e un punsadèn, e via prima ad n’ora e mez a vedar se i’ioperai i riva in temp (an’sa mai che i riva a n‘ora e trenta sinc, che alora pò ag’tgnem zo mez’ora!).

Lù l’ha tolt in parola quei ca vend i telefonèn:

1. Lasciare scaricare completamente le batterie perché si ricarichino bene!

Alora Bruno al riva a cà a la sira can sag’ved più, dez minut par snar e vedar al telegiornal e po’, cupà, a lèt; dop 4, 5 ori al baterii i’iè carghi al masim e via che la storia si ripete.

Tratto da “Mirandolesi razza ariana” di Gianni Bellini , anno 2006