Sta’ lunàri, che fin a poch ann fà l’era l’unich in dialett ch’a gniss fora in dal Mudnès, al s’arfà al nòm e a la figura dal mirandulès Antonio Bernardi ch’al fu al mond in dal secul passa e ch’i dgiivan l’A­strologo Mirandolese par via ch’al prediziiva al temp e ch’l’era un fanatich e un studiòs d’Astrologia.

Purtropp agh manca­va la preparaziòn e studiand i libar, al stel­li, al stagión a la so manèra al s’era persuàs che i Pianetta i girassan d’intorn’ a la Tèrra. Parsuàs che Copernico l’iss ciapa na capella e minga d’cal picculi, al s’mittì a stam­par su st’argoment di articui, di fuiett metereologich, a sò spési, e parfin un li­bar, dand fond a poch a la volta a tutt al suo e arduzéndas praticament a limòsna.

Parfurtùna ch’i l’ivan fatt Mistar d’la Scóla d’Disegn e ch’al gh’iva al sò stipendi (e pò un sussidi personal dal Dùca d’Módna) par tirar avanti.

Sta’ libar al s’ciamava “Il Nuovissimo Sistema Planetario”, ch’l’era pò un sistema ch’l’iva invintà lù; l’era un libar d’quasi zent pagini con la dimostrazion dal sò teorìi e con na “Mappa Celeste” andù a gh’era disgna gli orbiti nòvi di Pianetta.

Su la sò teorìa al taccava di button a fil doppi a chi agh capitava sotta e dimòndi agh dava ra­gion cum’as fà dal volti par dastòrsan d’un o parchè, più spess, i n’in savivan meno d’lù. E fin ché tutt andava pr al sò vers. A gh’era anch d’quéi ch’agh dava tort e al­lora zò litt, ch’i eran dal còmichi.

Tra i sò aversàri più accanii a gh’era al prét d’la Madunnìna che par disgrazia l’era un patii d’Copernico e ch’l’iva fat col sò man na Sfera Armillare con tutt al sò orbiti e al post giust. Sti dù sogett i s’cumbattivan a colp d’poesii e d’zirudélli che la gent aspettava in uraziòn, pressapoch cum a s’aspetta al fresch in Agóst, parchè i eran pini d’truvadi, d’termin d’Astronomia e d’Astrologia e d’tòlt’ in gir reciprochi.

Bernardi l’era un umòn grand e gros e, tolt via la sò mania, un brav òm, educa e’ corett ma tropp ingenuv; l’era cum’a s’ diis, un gnocch.

Tant par cuntarv’una, na volta, un grupp d’sò amigh ch’i s’a vdiivan al dop- mézdì par passaras n’ora in dal retro d’na farmacia ch’la s’ciamava la Cicógna (ch’l’a gh’é pò ancora e ch’l’è quella d’Salvioli) dop avéragh fat lézar soquànti dal sò poesii i l’incurunessan “poèta” mittendagh in cò par curòna na tressa d’ài con in mézz na qualch fòia d’allór; e lù tutt cuntent, quasi con al lagarmi a i occ ‘par la riconoscenza, a ringraziàri e a daragh la man.

In di ultim ann d’la sò vita al s’era miss a stampar dei “Pronostici” cioè a prevedar al temp; l’era tant parsuàs d’quell ch’al dgiiva che s’l’iva ditt o scritt che al tal dì a sarevv piuvù, al gniiva fora con l’umbrella, magari sott al brass, anch s’a gh’era al sòl.

Al muri in d’l’an 1859, a l’Uspidal d’Mòdna, in buletta negra a forza d’stam- par a sò spèsi di lunari e dal fotti; l’era nà a la Mirandula in dal 1795. Al Barnardón al deriva da lù, dal sò nom; dal ricord di sò fuiett d’Pronostich; anzi second mé in d’la figura ch’as véd ad sovra d’la lista di gioran e di Sant i an vlu faral lù, il gran Bernardi, al Barnardón, ch’al guarda con un cannuccial, dal luminarol d’na cà d’la Mirandula, al stelli e i pianetta… che, am dispiàs par Copernico, i giran da bòn, d’in­torn’ a la Tèrra.

Tratto da “Al Rezdor 1976”